| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 58.23 | Dem. 58.26 (English) | >>Dem. 58.29 |
58.25διὸ καὶ δεῖ φυλάττειν αὐτόν , μὴ πρὸς τοὺς ἐμοὺς λόγους μηδὲ τοὺς ὑπὸ τούτου ῥηθησομένους ἀποβλέποντας . οὐ γὰρ δίκαιον τοὺς ὑπὲρ τῶν νόμων καθημένους μακροῖς λόγοις καὶ κατηγορίαις προσέχειν , ἀλλʼ οἷς ἂν ἅπαντες ῥᾳδίως ἐπακολουθήσαιτε , καὶ διʼ ὧν δόξετε πᾶσι τοῖς ἐν τῇ πόλει τῶν νόμων ἀξίως ταύτην τὴν ἔνδειξιν δικάσαι , σαφῶς ἐρωτῶντας “τί λέγεις , Θεοκρίνη καὶ πάντες οἱ τῶν αὐτῶν τούτῳ μετέχοντες ; ἀξιοῦθʼ ἡμᾶς , κατὰ τοὺς νόμους ὀμωμοκότας δικάσειν , παρὰ τούτους διὰ τοὺς ὑμετέρους λόγους ψηφίζεσθαι ;
58.26μεμαρτυρηκότος μὲν ἡμῖν τοῦ Μίκωνος , καθʼ οὗ δοὺς Θεοκρίνης οὑτοσὶ τὴν φάσιν οὐκ ἐπεξῆλθε , καὶ πεποιηκότος αὑτὸν τούτοις ὑπόδικον , ὁμολογοῦντος δὲ τοῦ γραμματέως λαβεῖν τὴν φάσιν παρὰ τούτου , καὶ πεποιηκυίας τῆς μαρτυρίας τῆς ὀλίγον τι πρότερον ἀναγνωσθείσης αὐτὸν ὑπόδικον ; ἔτι δὲ τῶν τοῦ ἐμπορίου ἐπιμελητῶν μόλις μέν , ἀλλʼ οὖν ταὐτὰ τούτοις μεμαρτυρηκότων ; πρὸς δὲ τούτοις τῶν ἰδόντων ἐκκειμένην τὴν φάσιν καὶ προσελθόντων τοῖς ἄρχουσι μαρτυρούντων , ὥσπερ ὀλίγον πρότερον ἠκούσατε ;” ἀλλʼ οὐ δίκαιον , ὦ ἄνδρες δικασταί .
οὐ γὰρ δὴ διὰ τὸν τρόπον γε τὸν τοῦ φεύγοντος καὶ τὸν βίον ψευδεῖς ὑπολήψεσθε τὰς μαρτυρίας τὰς ἀνεγνωσμένας εἶναι . πολὺ γὰρ ἐκ τοῦ τρόπου σαφέστερον ἐπιδείκνυται Θεοκρίνης τοιοῦτος ὢν ἢ διὰ τῶν εἰρημένων . τί γὰρ οὐ πεποίηκεν οὗτος ὧν ἂν πονηρὸς καὶ συκοφάντης ἄνθρωπος ποιήσειεν ; οὐ διὰ μὲν τὴν τούτου πονηρίαν ἁδελφὸς αὐτοῦ θεσμοθετῶν καὶ τούτῳ χρώμενος συμβούλῳ τοιοῦτος ἔδοξε παρʼ ὑμῖν ἄνθρωπος εἶναι , ὥστε οὐ μόνον αὐτὸς ἀπεχειροτονήθη τῶν ἐπιχειροτονιῶν οὐσῶν , ἀλλὰ καὶ τὴν ἀρχὴν ἅπασαν ἐποίησεν ; καὶ εἰ μὴ δεομένων αὐτῶν καὶ ἱκετευόντων , καὶ λεγόντων ὡς οὐκέτι πρόσεισιν Θεοκρίνης πρὸς τὴν ἀρχήν , ἐπείσθηθʼ ὑμεῖς καὶ πάλιν ἀπέδοτε τοὺς στεφάνους αὐτοῖς , πάντων ἂν αἴσχιστα οἱ συνάρχοντες ἐπεπόνθεσαν ;
58.27
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 58.23 | Dem. 58.26 (English) | >>Dem. 58.29 |
